推銷員：太太，有無興趣幫小朋友報下學前班呢？
師奶：下！但我小朋友得幾個月大，咁快要去報學前班？而且學前班又貴。
推銷員：如果唔報定學前班，就會跟唔上，考唔到入國際幼稚園，又讀唔到一條龍直資名校，最後就會大學都考唔到，就做唔到專業人士，咩前途都無晒架啦！之後，佢嘅人工會低人一截，身邊嘅朋友睇佢唔起，佢就會成為人生失敗組，呢個係咪你想比你小朋友嘅人生？
師奶：即報！一位，唔該！
簡介：
滑坡謬誤（Slippery slope），同樣係一種常見嘅謬誤。犯錯者會舉出多個因果推論，但同時誇大每個因果之間嘅相關性，因果之間缺乏充分論證，令部分只係「有可能」，「極低可能」，「非必然」嘅因果變為必然發生。最終，得出唔合理嘅結果，所以，我地會唔容許/容許前提發生。辯場上的滑坡
滑坡謬誤係辯論場上相當常見，以下會舉幾條常見辯題比大家回憶下！
1. 同性婚姻合法化
正方：同心儀對像結婚係人權，與性別無關，所以同性伴侶嘅婚姻權利應受法例保障。
反方：友方同學話婚姻係人權，所以可以打破一男一女嘅基礎，今日同婚合法，咁聽日多人婚姻又係咪可以合法？後日人同寵物動物又可以結婚？大後日人同死物又係咪可以結婚？
反方指出因為同婚打破左一男一女嘅婚姻基礎，所以就會出現更多社會接受度更低嘅婚姻模式。因此，同婚不應合法化。但現實情況係：每種婚姻模式合法化都會考慮多個因素，例如：社會接受程度 ，而唔會因為同婚合法，就令其他模式必然合法。
2. 安樂死應合法化
正方：安樂死可以比身患絕症，生存意志低嘅病人，了結生命，免受折磨
反方：友方同學話唔想受折磨就比安樂死，咁有抑鬱症都可能生存意志好低，又係咪可以安樂死？肢體殘障都會令意志消磨，係咪又可以安樂死？甚至生活諸事不順，可能都覺得好折磨，係咪又可以安樂死？咁係咪變相鼓吹自殺？反方指出因為安樂死提供合法自殺嘅途徑，所以會有好多人借故了結生命，最終變相鼓勵自殺，所以連真正需要安樂死嘅人都唔應該有。但現實情況係，各地嘅安樂死對於「絕症」都有一定門檻，並唔會出現想死就可以安樂死嘅情況。滑坡謬誤 與 蝴蝶效應
滑坡謬誤其中一個問題係門檻太低，只要件事係「有可能」發生，而唔係「必然」發生，都有機會觸及滑坡謬誤。
例如：加稅
嚇走投資者香港經濟變差國際金融中心地位不保
呢一個情況都「可能」會出現，但因為加稅力度未必夠嚇走投資者，嚇走投資者嘅數量又未必夠令經濟變差，就算經濟變差都唔等於香港優勢盡失，做唔到國際金融中心地位不保。所以，就算推論合理，但由於唔係必然發生，所以都會係滑坡謬誤。
所以，同時會有另一個同滑坡謬誤衝突嘅效應 ，蝴蝶效應。「蝴蝶效應」指一件極少嘅事，都有機會帶來極大嘅影響，舉一個相當貼身嘅例子比大家思考下。如果我話「因為一單謀殺案，令中國無得睇NBA」，係唔係一個滑坡謬誤呢？
【起因】一個香港人去左台灣玩，但殺左自己女朋友；
【滑坡一】特區政府可能修例，引渡罪犯去中國受審；
【滑坡二】香港人可能會因為修例大力反抗，上街遊行示威不斷；
【滑坡三】香港政府可能出動武力鎮壓港人；
【滑坡四】武力鎮壓可能引起國際關注；
【滑坡五】外國人可能會表態反修例；
【滑坡六】表態個個外國人可能咁岩就係打籃球；
【滑坡七】中國可能會抵制個個外國人 ；
【滑坡八】中國就可能會禁播NBA。
你哋又覺得呢個係「滑坡謬誤」定「蝴蝶效應」？
原文刊登於：（2020年2月16日）https://www.facebook.com/hksdfdebate/photos/a.113046660115839/168491491238022