人呢，查實就好易偏心，好多時都係對自己寬鬆，對人哋就好嚴謹。所以喺人唔理性嘅情況下，往往就犯咗最常見嘅邏輯謬誤 — 「雙重標準」。現代文學家錢鍾書先生就笑言：可能人心係生喺左面，本身心就偏埋一邊，所以咪偏心囉。所以點解我哋喺準備辯論比賽嘅時候，成日都會話只有「相對公平」，而冇「絕對公平」。但當偏側得太犀利，你又服唔服呢？
所謂「雙重標準」，就係指喺冇充分理由嘅情況下，明明喺相類似嘅情境就採用咗同自己矛盾嘅標準。簡單嘅例子，就係准許某個群體或者人做某件事，但就唔畀另一個群體者或人做相同嘅事。
A：你幾時還錢畀我呀？
B：我哋唔係好朋友咩？我未有零用錢呀！你點可以喺好朋友有困難嘅時候，催朋友還錢呢？
A：下！咁呀C夠係你好朋友啦，之前佢話一時周轉唔到，你咪又係催佢還！點可以咁架你🥺
喺以上嘅例子，B君正正犯下咗「雙重標準」嘅邏輯謬誤！因為佢解釋唔到點解自己有困難嘅時候就可以大條道理叫好朋友唔好催佢還錢，但佢自己就可以催一個有經濟困難嘅好朋友還錢畀自己。其實呢個謬誤一啲都唔罕見呀，我哋不妨睇多幾個例子呀！
辯題：港府應將同性婚姻合法化
反：格硬將同性婚姻合法化，咪即係逼人要支持同性婚姻，尤其會侵犯宗教自由嘅人權喎！
正：咁點解嗰啲同性戀者嘅人權就唔叫人權，你嗰個宗教先叫人權呀？
辯題：港府應實施租金管制
反：實施租金管制，格硬控制租金水平，咪即係干預咗自由市場嘅運作囉。既然係咁，點解唔起多啲公屋？又或者派多啲租金津貼，咁咪得囉！
正：你起多咗公屋，派多啲租金津貼，政府咪又係出手干預咗個市場！點解你嗰啲又做得，我嗰啲又唔做得呢？
喺大家最近瘋狂搶口罩，「兩盒唔該！」嘅時候，有一啲名人就弄巧反拙，喺佢嘅言論間，其實都犯下咗雙重標準嘅謬誤。
台灣藝人范瑋琪近日就對台灣「禁止口罩出口」持反對意見，更加喺網上辱罵行政院長蘇貞昌係狗官！但正當有網民問佢，點解喺過去幾個月，香港反修例運動入面，有人被打壓，你又唔出聲呢？佢竟然話：「我不想參與政治。」至於點解會係雙重標準，就交畀大家思考下喇！
但…… 龍門任搬，點同你玩呀！？大家千祈唔好學呀！
原文刊登於：（2020年2月10日）https://www.facebook.com/hksdfdebate/photos/a.113046660115839/164168355003669/